လေအာသည် မည်သူနည်း - ဖြတ်သန်းခဲ့သော ဘဝပုံရိပ်များ

Breaking

Home Top Ad

ထာဝရဘုရား ကောင်းမြတ်တော်မူသည့်အကြောင်းကို မြည်းစမ်း၍ သိမှတ်ကြလော့ (ဆာလံ၊ ၃၄:၈)

Post Top Ad

ထာဝရဘုရားသည် ငါ၏သိုးထိန်းဖြစ်တော်မူ၏ (ဆာလံ၊ ၂၃:၁)

Monday, November 8, 2021

လေအာသည် မည်သူနည်း

၁။ သမိုင်းကြောင်းနောက်ခံ။

လေအာသည် လာဗန်၏သမီး၊ ရာခေလ၏အစ်မ၊ ယာကုပ်၏ဇနီးဖြစ်ပြီး၊ ယာကုပ်၌ သားခုနှစ် ယောက် ကိုဖွားမြင် သောမိခင်တစ်ဦးဖြစ်သည်။

လေအာကို ပထမဦးဆုံး ဖေါ်ပထားသည်က ယာကုပ်အမည်နှင့်တွဲလျက်ရှိနေခဲ့သည်။ ယာကုပ်သည် ဖခင်ဖြစ်သူကို မုသာစကားဆိုလျက် သားဦးမင်္ဂလာကိုအရယူခဲ့ပြီးနောက် မွေးရပ်ဌာနေတွင်နေရန် မဖြစ်နိုင် တော့ပဲ ခါရန်အရပ်တွင်ရှိသော ဦးလေးဟာလာဗန်ထံသို့ သွားရန်အကြောင်းဖန်လာခဲ့သည် (က၊ ၂၇:၁-၁၂၉)။ 

 

ထိုသို့ဦးလေးလာဗန်ထံသို့ရောက်သောအခါ ယာကုပ်သည်  ဦးလေးလာဗန်၏ သမီးအငယ်မဖြစ်သော ရာခေလ ကို ချစ်ခင်စုံမက်ခဲ့သည်။ လေအာမှာ သမီးကြီးဖြစ်၍ အိမ်ထောင်ပထမပြုသင့်သည်မှန်သော်လည်း ရုပ်ဆင်း အင်္ဂါ မှာ ရာခေလ ကဲ့သို့ချောမောသူဖြစ်မနေခဲ့ (က၊ ၂၉:၁၇)။

 

ယာကုပ်သည် ရာခေလကိုချစ်သည့်စိတ်ကြောင့် ဦးလေးလာဗန်နှင့် အပေးအယူသဘောဖြင့် ခုနှစ်နှစ် အစေခံပြီး ထိမ်းမြားပေးရန်ကတိကဝတ်ထားခဲ့ကြသည်။

 

၂။ ယာကုပ်၏ အချစ်ခရီး။

              ယာကုပ်သည် ခုနှစ်လွန်မြောက်ပြီးသောအခါ ရာခေလအားဇနီးအဖြစ်ထိမ်းမြားခွင့်ကိုတောင်းဆိုသည် (က၊ ၂၉:၂၁)။ ဦးလေးဖြစ်သူသည် မင်္ဂလာပွဲကိုကျင်းပ၍ ညအချိန်ရောက်သေအာခါ ရာခေလအစား လေအာနှင့် ထိမ်းမြားပေးခဲ့လေသည်။ နှုတ်ကပတ်တော်၌မည်သို့အလှည့်အပြောင်းပြု၍ ထိမ်းမြားပေးခဲ့သည်ကို အသေး စိတ် ဖေါ်ပြမထားခဲ့။

              သို့သော်လည်း ယာကုပ်သည် ထိုညကလေအာနှင့် လင်မယားအရာမြောက်ခဲ့ပြီး မနက်မိုးလင်းသော အခါ၌ တုန်လှုပ် ခဲ့လေသည် (က၊ ၂၉:၂၃-၂၅)။

 

၃။ လေအာ၏ အချစ်ရေး။

              စိတ်ပျက်ခြင်းကြီးစွာဖြင့် ယာကုပ်သည် ဦးလေးဖြစ်သူလာဗန်အား ဘာကြောင့် ခုနှစ်နှစ်တိုင်တိုင်ချစ်၍ တောင်းခံခဲ့ သော ရာခေလအစား လေအာကိုဘာကြောင့်ပေးစားခဲ့သနည်းဟူ၍ မေးမြန်းခဲ့သည်။

              ထိုအခါဦးလေးဖြစ်သူ လာဗန်သည် သူ့လှည့်ကွက်အတွက်တောင်းပန်ခဲ့ခြင်းမပြုပဲ သမီးကြီးကို ထိမ်းမြား ပြီးမှသာ လျင်သမီးအငယ်ဖြစ်သူကိုသာ ထိမ်းမြားပေးလေ့ရှိကြောင်းဆိုကာ ရာခေလကို ထပ်မံ ထိမ်းမြားလိုပါက နောက်ခုနှစ်နှစ် အစေခံရန်တောင်းဆိုခဲ့သည် (က၊ ၂၉:၂၆)။

              ထိုစကားကို ယာကုပ်သဘောတူခဲ့သည်။ ထိုသို့ဖြင့် ရာခေလအတွက် ခုနှစ်နှစ်ထပ်မံ၍အစေခံရန် သဘောတူမှုကို ရယူပြီး လေအာနှင့်ထိမ်းမြားပြီး၍ တစ်ပတ်လွန်သောအခါ ရာခေလနှင့်ထပ်မံ၍ ထိမ်းမြား ပေးခဲ့သည် (က၊ ၂၉:၂၇)။  ထိုအခါ လေအာသည် မိမိခင်ပွန်းဖြစ်သူအား ညီမဖြစ်သူနှင့် တစ်ပါတ်စီအလှည့်ကျ ဖြင့် ကြင်ခွင့်ပြုခဲ့ရသည်။

 

၄။ လေအာနှင့် အိမ်ထောင်ရေးအပူ။

              ဝမ်းနည်းစရာမှာ ယာကုပ်သည် ရာခေလအား လေအာထက်ပို၍ချစ်မြတ်နိုးခဲ့သည်။

              ထိုအခါ ဘုရားသခင်သည် လေအာအားသနားကရုဏာတော်ရှိ၍ သားဖွားခွင့်ကိုပေးတော်မူခဲ့သည်။ “လေအာသည် အမုန်းခံရသည်ကို ထာဝရဘုရားသိမြင်၍၊ သားဘွားရသောအခွင့်ကို ပေးတော်မူ၏”(က၊ ၂၉:၃၁)။ 

 

လေအာသည် အမုန်းခံရသည်ကို ထာဝရဘုရားသိမြင်၍၊ သားဘွားရသောအခွင့်ကို ပေးတော်မူ၏

 

              ထိုသို့ဖြင့် လေအာသည် သားရုဗင်ကိုဖွားမြင်ခဲ့သည်။ ရုဗင်အမည်မှာ “ဘုရားသခင်သည် ငါ့ဒုက္ခကို သိမြင်တော်မူ၏” ဟူ၍အဓိပ္ပါယ်ရပါသည်။ ထိုသို့ဖြင့် လေအာသည် ယာကုပ်အားဖြင့် အခြားသားသုံးဦး ဖြစ်သော ရှိမုန်၊ လေဝိ၊ ယုဒတို့ကိုမွေး ခဲ့ပြန်ပါသည် (က၊ ၂၉:၃၃-၃၅)။

              ထိုအချိန်တွင် ညီမဖြစ်သူ ရာခေလသည်လည်း အစ်မဖြစ်သူက ကလေးမွေးပြီး သူကိုယ်၌က ကလေး မမွေးသော အခါငြူစူမှုရှိလာသည်။ ထိုသို့ဖြင့် သူတို့၏ ယဉ်ကျေးမှုဓလေ့ထုံးစံအရ ကျွန်မ “ဗိလဟာ”ကို ယာကုပ်အားပေး၍ အတူအိပ် စေခြင်းဖြင့်သားသမီးယူရန်ကြံစည်ခဲ့သည် (က၊ ၃၀:၃)။ ထိုသို့ဖြင့် ကျွန်မ “ဗိလဟာ” အားဖြင့် ဒန်နှင့် နဿလိကိုမွေးခဲ့သည်။

              ထိုအခါ လေအာသည် ကိုယ်တိုင်လည်း သားသမီးမရရှိတော့ဟူ၍ သိကာ ညီမဖြစ်သူ၏ အစီအစဉ်ကို ဟန့်တားစေ လို၍ မိမိ၏ ကျွန်မဖြစ်သော “ဇိလပ” ကိုပေးအပ်ခဲ့သည်။ ကျွန်မ “ဇိလပ” အားဖြင့် မွေးလာ သောသားကို “ကောင်းကြီး မင်္ဂလာယူလာပေးခြင်း” အမှတ်ဖြင့် ဂဒ်ဟူ၍ မှည့်ခေါ်ခဲ့ပြီး၊ နောက်တစ်ဖန် သားကိုရသောအခါ “ငါ့သည်မင်္ဂလာရှိသောသူ ဟုထင်ရှားစွာအသိအမှတ်ပြုခြင်းခံရမည်” ဟူ၍အဓိပ္ပါယ် ရသော အမည်ဖြင့် “အာရှာ” ဟူ၍မှည့်ခဲ့သည်။ ထိုသို့ဖြင့် လေအာ သည်ယာကုပ်၌ တရားဝင်သားသမီးများကို များပွားစေခဲ့ပါသည်။ 



၅။ ညီအစ်မကြားက အပေးအယူ။

            ဆက်လက်ပြီး ညီအစ်မနှစ်ဦးကြားအပြိုင်အဆိုင်ရှိနေခဲ့ကြသည်။ အထူးသဖြင့် ရာခေလသည် မိမိရင်၌ လွယ်၍ဖွား ရသောသားသမီးများမရှိပဲ ကိတ္တိမသားများသာရှိနေခဲ့သည်။

            တစ်နေ့သောအခါ လေအာ၏သားရုဗင်သည် တောတွင်းမှ “အနုဆေးသီး”ကို ရရှိလာခဲ့သည်။ ရှေးခေတ်ထုံစံအရ ထို “အနုဆေးသီး” သည်ကိုယ်ဝန်မြုံနေခြင်းကိုကုစား၍၊ သားသမီးပွားများစေသည် ဟူသောအယူဖြင့်မှတ်ယူကြသည်။ ထိုအခါ ရာခေလသည် သူ့မြုံနေခြင်းကို ကုစားဖို့ရန် လေအာထံ၌ တောင်းဆိုခဲ့သည်။ ထိုအခါ လေအာက “လေအာက၊ သင်သည် ငါ့လင်ကိုယူ၍ အတွက် မရှိထင်သလော။ ငါ့သား၏ အနုဆေးသီးကိုလည်း ယူချင် သေးသည်တကားဟု ဆိုလေသော်၊ ရာခေလက၊ သို့ဖြစ် လျှင်၊ သင့်သား၏ အနုဆေးသီးအတွက်၊ လင်သည် ယနေ့ ညဉ့်တွင် သင်နှင့်အိပ်ရမည်ဟု ဆို၏” (က၊ ၃၀:၁၅) ဟုဆိုခဲ့သည်။

 

၆။ အခဖြင့်ရယူခြင်း။

 

            ထိုသို့ဖြင့် ရာခေလ၏ အပေးအယူကို သဘောတူပြီး ထိုညအဖို့ ယာကုပ်ကို လေအာပိုင်ဆိုင်ခွင့် ရခဲ့သည်။ ထိုသို့ ညီအစ်မအကြား အပေးအယူပြုခြင်းကို ဘုရားသခင်သိမြင်တော်မူခဲ့ပြီး လေအာအား သားဖွားရခြင်းအခွင့်ကို ပေးတော်မူခဲ့ သည်။ ထိုသို့ဖြင့် နောက်ထပ်သားကိုရသောအခါ လေအာသည် ထိုသားအား ဣသခါဟူ၍မှည့်ခဲ့ပြီး အဓိပ္ပါယ်မှာ “ဘုရား သခင်သည် ငါ့အားအခကိုပေးတော်မူ၏” ဟူ၍ဆိုသည် (က၊ ၃၀:၁၅)။ ထို့နောက်တွင်လည်း လေအာသည် ဇာဗုလုန်နှင့် ဒိန ဟူသောသားတစ်ဦးနှင့် သမီးတစ်ဦးကိုရရှိခဲ့သည်။ နှုတ်ကပတ်တော်၌ ယာကုပ်အဖို့ တစ်ဦးတည်းသောသမီးအဖြစ်လည်း ဒိန ကိုဖေါ်ပြထားပြီး၊ ထိုတစ်ဦးတည်းသောသူသာ သမီးဖြစ်ကြောင်းမှတ်ယူနားလည်ရပါသည်။

 


၇။ ဘုရားမျက်နှာသာရသော လေအာ။

            ခင်ပွန်းဖြစ်သူနှင့် ညီမဖြစ်သူက မချစ်မနှစ်သက်၊ မျက်နှာသာပေးခြင်းမရသော်လည်း ဘုရားသခင် သည် လေအာ အားမိခင်ဖြစ်ခြင်းနှင့်အတူ များပြားလှစွာသောမင်္ဂလာရှိသည့် မိခင်တစ်ဦးအဖြစ် ကောင်းကြီး ပေးတော်မူခဲ့သည်။

            ထိုထက်ပိုသောကောင်းကြီးမှာ ဘုရားသခင်သည် သားဖြစ်သူ လေဝိအား ဣသရေလလူမျိုးတော် များအတွက် ဦး ခေါင်းအဖြစ်ရွေးချယ်ခဲ့ပြီး၊ ဝတ်ပြုကိုးကွယ်ရေးတည်းဟူသော တဲတော်အရေးတွင်လည်း ကောင်းကြီးပေး၍ ချီးမြောက်မှု ပြုခဲ့ပါသည်။

            ထို့အတူ စတုတ္ထသားဖြစ်သော ယုဒသည်လည်း အာဗြဟံ၊ ယာကုပ်စသော ဣသရေလတို့၏ ဘိုးဘွားစာရင်းလာ ကတိတော်ပြည်နှင့်စပ်ဆိုင်သော ပဋိညာဉ်ကိုပြုရာ၌ အကောင်အထည်ဖေါ်ရာတွင် ရွေးချယ်၍ကောင်းကြီးပေးအသုံးခံစေ တော်မူခဲ့ပြန်ပါသည်။

            ဘုရားသခင်သည် တစ်နေ့သောအခါတွင် အာဗြဟံ၏မျိုးဆက်အားဖြင့် လူမျိုးတကာတို့အား ကောင်းကြီး ခံစားစေ မည်ဟူသောကတိတော်သည်လည်း ထိုသူအားဖြင့် ပြည့်စုံစေခဲ့သည် (က၊ ၁၂:၁-၃၊ ၂၂:၁၇-၁၈)။ ထိုကောင်းကြီးမင်္ဂလာသည် လောကီသားအားလုံးအလို့ငှါ မိမိ၏ အသက်၊ သွေးချွေးနှင့် ခန္ဓာတော် ကိုစွန့်တော်မူခဲ့သော ခရစ်တော်ဘုရား၏ မဟာကယ် တင်ခြင်းကိုမိန့်တော်မူ၍ ထိုအတိုင်းပြည့်စုံစေ တော်မူခဲ့ပါသည် (ယော၊ ၃:၁၆)။ ယေရှုခရစ်တော်သည် လေအာမှဆင်းသက်၍ လာသော၊ ယုဒအနွယ် အဖြစ်ထင်ရှားခဲ့သည်။ လေအာအပေါ်၌ ဘုရားသခင်ထားသောကောင်းကြီးမင်္ဂလာသည် ကျွန်ုပ်တို့အဖို့ သင်ခန်းစာယူစရာများစွာရှိနေပါသည်။

           

နာမတော်မြတ်၌

 

ဆယ်မြူရယ်စိုးလွင်

 

မှတ်ချက်။ ။ Who was Leah in the Bible? အားမြန်မာမူပြုပါသည်။

 

No comments:

Post a Comment

စာဖတ်သူအမြင်နှင့် အကြံပြုချက်များကို မြော်လင့်ကြိုဆိုပါသည်...

Post Bottom Ad

ထာဝရဘုရားသည် ငါ၏သိုးထိန်းဖြစ်တော်မူ၏ (ဆာလံ၊ ၂၃:၁)

Pages